महत्वाच्या बातम्या

 टसर रेशीमवर अखेरच्या टप्प्यात रोगांचा प्रादुर्भाव : अळ्या मरू लागल्याने शेतकरी चिंतेत


- कमी पावसामुळे चांगल्या उत्पादनाची अपेक्षा; कोषनिर्मितीच्या निर्णायक टप्प्यात नुकसान होण्याची भीती

विदर्भ न्यूज एक्सप्रेस 
तालुका प्रतिनिधी / आरमोरी : यंदा कमी पावसामुळे पोषक वातावरण निर्माण झाल्याने टसर रेशीम शेती चांगली बहरली होती. मात्र, ऐन कोषनिर्मितीच्या टप्प्यात थंडी आणि वातावरणातील बदलामुळे रोगांचा प्रादुर्भाव वाढला असून रेशीम अळ्या मरून पडत आहेत. त्यामुळे टसर रेशीम उत्पादक शेतकरी अडचणीत सापडले असून यंदा कोष उत्पादनात घट होण्याची शक्यता आहे. ऑक्टोबर महिन्यात टसर अंडीपुंजांचे संगोपन करण्यात आले होते.

त्यानंतर अळ्यांची चांगली वाढ होऊन त्या कोषनिर्मितीच्या अवस्थेत पोहोचल्या आहेत. मात्र, याच निर्णायक टप्प्यात रोगांचा प्रादुर्भाव झाल्याने अळ्या मृत्युमुखी पडत आहेत. परिणामी, शेतकऱ्यांनी घेतलेली मेहनत आणि केलेला खर्च वाया जाण्याची भीती निर्माण झाली आहे.

पूर्व विदर्भातील गडचिरोली, चंद्रपूर, गोंदिया आणि भंडारा या चार जिल्ह्यांतील १३ तालुक्यांत मोठ्या प्रमाणावर टसर रेशीम शेती केली जाते. रेशीम संचालनालयामार्फत अंडीपुंजांचा पुरवठा, प्रशिक्षण, तांत्रिक मार्गदर्शन आणि कोषांना बाजारपेठ उपलब्ध करून दिली जाते. या व्यवसायामुळे अनेक आदिवासी शेतकऱ्यांना पूरक उत्पन्नाचे साधन मिळाले आहे. 

गतवर्षी अतिवृष्टीमुळे उत्पादन घटले होते. यंदा सुरुवातीला पोषक वातावरण असल्याने चांगल्या उत्पादनाची अपेक्षा होती. मात्र, अंतिम टप्प्यात रोगराईचा प्रादुर्भाव झाल्याने शेतकऱ्यांच्या अपेक्षांवर पाणी फिरण्याची शक्यता आहे. रेशीम अळ्यांचे संरक्षण करण्यासाठी तातडीने तांत्रिक मार्गदर्शन व आवश्यक उपाययोजना करण्याची गरज व्यक्त होत आहे.





  Print






Related Photos