Petrol Price
भरधाव दुचाकीची पादचाऱ्याला जोरदार धडक : एक मृत्यू, एक जखमी
विदर्भ न्यूज एक्सप्रेस
प्रतिनिधी / चंद्रपूर : भरधाव दुचाकीने समोरून जोरदार धडक दिल्याने सिद्धांत सुभाष लाडे २६ वर्षे रा. चकपिरंजी, ता. सावली, जि. चंद्रपूर या तरुणाचा मृत्यू झाला, तर दुचाकीवर मागे बसलेला राकेश उमाजी फाले हा जखमी झाला. ही घटना बुधवार, २१ ऑक्टोबर रोजी सायंकाळी ६.३० वाजताच्या सुमारास चंद्रपूर-गडचिरोली महामार्गावरील चकपिरंजी गावाजवळील सिमेंट रस्त्यावर घडली.
सिद्धांत लाडे हा चकपिरंजी गावालगत गडचिरोली रोडवरील क्रीडासंकुलात सुरू असलेल्या मैदानाच्या कामावर ट्रॅक्टरचालक म्हणून काम करीत होता. बुधवारी सायंकाळी काम संपल्यानंतर तो पायी घरी परतत होता. दरम्यान, बजाज पल्सर दुचाकी क्रमांक एमएच ३४ सीयू ९०४२ वरील चालक दादाजी रमेश फाले याने आपल्या बाजूऐवजी रस्त्याच्या विरुद्ध दिशेने दुचाकी आणून सिद्धांतला समोरून जोरदार धडक दिली. या धडकेत सिद्धांत गंभीर जखमी होऊन रस्त्यावर कोसळला.
अपघाताची माहिती मिळताच सिद्धांतचा चुलत भाऊ जयकुमार लाडे घटनास्थळी धावत गेला. त्यावेळी सिद्धांतच्या डोक्याला, छातीला आणि चेहऱ्याला गंभीर दुखापत झाली होती. त्याच्या नाकातून रक्तस्राव होत होता. अपघातग्रस्त दुचाकीही रस्त्यावर पडलेली होती. दरम्यान, सावली पोलिसांनी घटनास्थळी पोहोचून उपस्थितांकडे चौकशी केली. त्यावेळी दुचाकी दादाजी रमेश फाले चालवत होते, तर राकेश उमाजी फाले हे मागे बसले होते, अशी माहिती समोर आली. त्यानंतर नागरिकांच्या मदतीने एका चारचाकी वाहनातून सिद्धांतला ग्रामीण रुग्णालय, सावली येथे नेण्यात आले. मात्र, तेथील डॉक्टरांनी तपासणी केल्यानंतर त्याला मृत घोषित केले.
या प्रकरणी मृताचा चुलत भाऊ जयकुमार दिलीप लाडे यांनी सावली पोलीस ठाण्यात तोंडी तक्रार दिली आहे. दुचाकीचालकाने भरधाव वेगाने आणि निष्काळजीपणे वाहन चालवून विरुद्ध दिशेने येत सिद्धांतला धडक दिल्याने त्याचा मृत्यू झाला, तसेच दुचाकीवर मागे बसलेला राकेश फाले जखमी झाला, असे तक्रारीत नमूद करण्यात आले आहे.पुढील तपास सावली पोलीस करीत आहे.
