Petrol Price
स्कूटर घसरून सिमेंट रस्त्यावर पडल्याने १९ वर्षीय तरुणाचा मृत्यू
- गिरोला-खोडशिवनी मार्गावरील बसथांब्याजवळ मध्यरात्रीची घटना; डुग्गीपार पोलिसांत आकस्मिक मृत्यूची नोंद
विदर्भ न्यूज एक्सप्रेस
प्रतिनिधी / गोंदिया : स्कूटरवरील नियंत्रण सुटल्याने वाहन घसरून सिमेंट रस्त्यावर पडल्यामुळे गंभीर मार लागून १९ वर्षीय तरुणाचा मृत्यू झाल्याची घटना घडली. डुग्गीपार पोलिस ठाण्याच्या हद्दीतील गिरोला-खोडशिवनी मार्गावरील बसथांब्याजवळ शुक्रवारी १६ मध्यरात्री सुमारे २:३० वाजताच्या दरम्यान हा अपघात झाला. सुमंता मनभंजन पांडे १९ वर्षे, रा. कमगाव-माहुले, ओडिशा असे मृत तरुणाचे नाव आहे.
कामावरून परतताना काळाचा घाला -
मिळालेल्या माहितीनुसार, सुमंता पांडे हा हार्वेस्टर चालक म्हणून काम करीत होता. काम आटोपल्यानंतर तो स्कूटरने गिरोला येथे परत जात होता. दरम्यान, गिरोला-खोडशिवनी मार्गावरील बसथांब्याजवळ अचानक काहीतरी आडवे आल्याने त्याचे स्कूटरवरील नियंत्रण सुटले. त्यामुळे स्कूटर घसरून तो सिमेंट रस्त्यावर पडला. रस्त्यावर पडल्याने गंभीर मार लागून त्याचा मृत्यू झाला.
डुग्गीपार पोलिसांत आकस्मिक मृत्यूची नोंद -
या घटनेची माहिती मिळाल्यानंतर शुक्रवारी १६ सकाळी ८:५८ वाजता डुग्गीपार पोलिस ठाण्यात आकस्मिक मृत्यूची नोंद करण्यात आली. या प्रकरणाचा पुढील तपास पोलिस हवालदार दिलीप हातझाडे करीत आहेत.
अल्पवयातच तरुणाचा अपघाती मृत्यू झाल्याने हळहळ व्यक्त होत आहे.
