Petrol Price
कबड्डीचा सामना पाहून परतणाऱ्यांची वाघाशी गाठ
- भदूटोल्यात रात्री पट्टेदार वाघाचे दर्शन; थरकाप उडवणाऱ्या घटनेने गावात खळबळ
विदर्भ न्यूज एक्सप्रेस
प्रतिनिधी / गोंदिया : सडक-अर्जुनी तालुक्यातील भदूटोला गावात शनिवारी ३ रात्री सुमारे ११ वाजताच्या सुमारास पट्टेदार वाघाचे प्रत्यक्ष दर्शन झाल्याने परिसरात एकच खळबळ उडाली. राका येथे कबड्डीचा सामना पाहून रात्री उशिरा गावाकडे परतणाऱ्या काही मुलांना प्रेमलाल सोनवणे यांच्या शेताजवळ अचानक मोठा पट्टेदार वाघ दिसला. अंधारात अचानक समोर आलेला वाघ पाहून मुलांची अक्षरशः घाबरगुंडी उडाली. सुदैवाने या घटनेत कोणतीही जीवितहानी झाली नाही.
मिळालेल्या माहितीनुसार, भदूटोला येथील काही मुले राका येथे कबड्डीचा सामना पाहण्यासाठी गेली होती. सामना संपल्यानंतर रात्रीच्या सुमारास ही मुले गावाकडे परतत होती. दरम्यान, प्रेमलाल सोनवणे यांच्या शेताजवळ पोहोचताच त्यांना अचानक रस्त्यालगत पट्टेदार वाघ दिसला. काही क्षणांसाठी मुलांसमोरच वाघाचा वावर असल्याने त्यांच्यात भीतीचे वातावरण निर्माण झाले. प्रसंगावधान राखत मुलांनी सुरक्षित अंतर गाठले आणि घटनेची माहिती गावकऱ्यांना दिली.
वनविभागाचे पथक घटनास्थळी -
वाघ दिसल्याची माहिती मिळताच वनविभागाला तातडीने कळविण्यात आले. माहिती मिळताच वनविभागाचे कर्मचारी ए. एस. रंगारी आपल्या पथकासह घटनास्थळी दाखल झाले. वनकर्मचाऱ्यांनी परिसराची पाहणी करून वाघाच्या हालचालींचा मागोवा घेण्याचा प्रयत्न केला. यावेळी शेत परिसरात वाघाच्या पाऊलखुणा आढळून आल्या.
ए. एस. रंगारी यांच्याशी संपर्क साधला असता, घटनास्थळी वाघाच्या पाऊलखुणा आढळून आल्याचे त्यांनी सांगितले. पाऊलखुणांच्या प्राथमिक तपासणीवरून हा पट्टेदार वाघ असून त्याचे वय अंदाजे तीन वर्षांपेक्षा अधिक असावे, असा प्राथमिक अंदाज वनविभागाच्या कर्मचाऱ्यांनी व्यक्त केला आहे.
वाघाच्या दर्शनाने शेतकरी धास्तावले -
भदूटोला परिसरात रात्रीच्या वेळी वाघाचे प्रत्यक्ष दर्शन झाल्याने ग्रामस्थ आणि शेतकऱ्यांमध्ये भीतीचे वातावरण निर्माण झाले आहे. शेत परिसरात वाघाचा वावर असल्याने रात्रीच्या वेळी शेतात जाणाऱ्या नागरिकांच्या सुरक्षेचा प्रश्न निर्माण झाला आहे. वाघ पुन्हा मानवी वस्तीकडे येण्याची शक्यता लक्षात घेता वनविभागाने या परिसरात लक्ष ठेवणे आवश्यक असल्याचे ग्रामस्थांचे म्हणणे आहे.
रात्री एकट्याने बाहेर पडू नका -
भदूटोला परिसरात वाघाचे दर्शन झाल्याच्या पार्श्वभूमीवर वनविभागाने नागरिकांना सतर्क राहण्याचे आवाहन केले आहे. रात्री-अपरात्री नागरिकांनी एकट्याने घराबाहेर पडू नये. अत्यावश्यक कामासाठी बाहेर पडावे लागल्यास दोन-चार जणांनी एकत्रितपणे जावे आणि आवाज करत मार्गक्रमण करावे, असे आवाहन करण्यात आले आहे.
विशेषतः शेतकरी व शेतमजुरांनी रात्रीच्या वेळी शेत परिसरात एकट्याने जाणे टाळावे, तसेच वाघ किंवा अन्य वन्यप्राणी दिसल्यास त्याच्या जवळ जाण्याचा अथवा त्याला हुसकावून लावण्याचा प्रयत्न करू नये, असे आवाहनही वनविभागाकडून करण्यात येत आहे.
वनविभागाने गस्त वाढविण्याची मागणी -
रात्रीच्या वेळी शेत परिसरात वाघाचा वावर आढळून आल्याने वनविभागाने भदूटोला आणि परिसरात नियमित गस्त वाढवावी, अशी मागणी ग्रामस्थांकडून होत आहे. वाघाच्या हालचालींवर लक्ष ठेवण्यासाठी आवश्यक त्या उपाययोजना करून नागरिकांना सुरक्षिततेबाबत मार्गदर्शन करावे, अशी अपेक्षाही व्यक्त केली जात आहे.
तीन वर्षांपेक्षा अधिक वयाच्या वाघाचा अंदाज -
वनविभागाला घटनास्थळी आढळलेल्या पाऊलखुणांवरून वाघाचे अस्तित्व स्पष्ट झाले आहे. प्राथमिक अंदाजानुसार हा वाघ तीन वर्षांपेक्षा अधिक वयाचा असण्याची शक्यता आहे. त्यामुळे हा वाघ परिसरात नेमका कुठून आला आणि त्याचा वावर कोणत्या दिशेने आहे, याचा वनविभागाकडून मागोवा घेणे महत्त्वाचे ठरणार आहे.
आता वन्यप्राण्यांचा मोर्चा शहरांकडेही -
गोंदिया जिल्हा मोठ्या प्रमाणावर जंगलव्याप्त असल्याने वाघ, बिबट्या तसेच इतर वन्यप्राण्यांचा गावालगतच्या भागात वावर असणे नवीन नाही. जंगलालगत असलेल्या गावांमध्ये वन्यप्राण्यांचे दर्शन वेळोवेळी होत असते. मात्र, अलीकडच्या काळात वन्यप्राण्यांचा मोर्चा मानवी वस्त्यांसह शहरांकडेही वळत असल्याचे चित्र दिसून येत आहे.
गोंदिया शहरातील गौरीनगर परिसरात सध्या बिबट्याचा वावर असल्याचे समोर आले असून, त्याने प्राण्यांची शिकार केल्याचेही निदर्शनास आले आहे. या पार्श्वभूमीवर वन विभागाकडून आवश्यक ती कार्यवाही करण्यात येत आहे. यापूर्वी जिल्हाधिकारी कार्यालयाच्या परिसरातही वाघ शिरल्याची घटना घडली होती. त्यामुळे जंगलातील वन्यप्राणी मानवी वस्त्यांच्या जवळ येण्याच्या घटनांमुळे नागरिकांच्या सुरक्षेचा प्रश्न अधिक गंभीर बनला आहे.भदूटोला येथील ताज्या घटनेनंतर वनविभागाने वाघाच्या हालचालींवर बारकाईने लक्ष ठेवून ग्रामस्थांची भीती दूर करण्यासाठी प्रभावी उपाययोजना करणे गरजेचे आहे.
