Petrol Price
हयात प्रमाणपत्र सत्यापन ॲपद्वारे सादर करण्याचे आवाहन
विदर्भ न्यूज एक्सप्रेस
प्रतिनिधी / वर्धा : राज्य पुरस्कृत संजय गांधी निराधार अनुदान योजना, श्रावणबाळ सेवा राज्य निवृत्तीवेतन योजना, तसेच केंद्र पुरस्कृत इंदिरा गांधी राष्ट्रीय निवृत्तीवेतन योजनेच्या लाभार्थ्यांना हयात प्रमाणपत्र सादर करण्यासाठी सत्यापण ॲप वापर करुन डिजीटल हयात प्रमाणपत्र सादर करता येणार आहे. वर्धा तालुक्यातील लाभार्थ्यांनी या ॲपचा वापर करुन हयात प्रमाणपत्र सादर करावे, असे अवाहन करण्यात आले आहे.
योजनेंतर्गत राज्य पुरस्कृत संजय गांधी निराधार अनुदान योजना व श्रावणबाळ सेवा राज्य योजनेतील वृध्द, विधवा, घटस्फोटीत महिला, परित्यक्या, अनाथ, अंपग, दुर्धर आजाराने ग्रस्त व्यक्ती इत्यादी लाभार्थ्यांना हयात प्रमाणपत्र सादर करावे लागतात. यापुर्वी लाभार्थ्यांना हयात प्रमाणपत्र सादर करण्यासाठी प्रत्यक्ष बँक, पोस्ट ऑफिस किंवा तहसिल कार्यालयात जावे लागत होते. लाभार्थ्यांची गैरसोय दूर करण्यासाठी सत्यापन ॲपद्वारे हयात प्रमाणपत्र सादर करण्याची प्रक्रिया सुलभ व सोयीस्कर करण्यात आली आहे. त्यामुळे पात्र लाभार्थ्यांनी विहीत कालावधीत आपले हयात प्रमाणपत्र सत्यापन ॲपद्वारे सादर करुन योजनेच्या अर्थसहाय्याचा लाभ नियमितपणे सुरु ठेवावा.
हयात प्रमाणपत्र ऑनलाईन पध्दतीने सादर न केल्यास लाभार्थ्यांचे अर्थसहाय्य प्रलंबित अथवा बंद होण्याची शक्यता असते. त्यामुळे संबंधित ज्या लाभार्थ्यांनी अद्याप पर्यंत हयात प्रमाणपत्र सादर केलेले नाही, अशा लाभार्थ्यांनी विलंब न करता हयात प्रमाणपत्र सादर करण्याची कार्यवाही पूर्ण करावी. हयात प्रमाणपत्र सादर करण्याबाबत काही अडचण किंवा अधिक माहितीसाठी तहसिल कार्यालय, सेतू केंद्राशी सपंर्क साधावा, असे वर्धाच्या तहसिलदारांनी कळविले आहे.
