महत्वाच्या बातम्या

प्रतीक्षा संपली घोडाझरी शाखा कालव्यातून प्रथमच वाहणार पाणी

- गोसेखुर्द प्रकल्पाच्या कालव्याची पहिली चाचणी : २९ हजार हेक्टर क्षेत्राला सिंचनाची नवी आशा

विदर्भ न्युज एक्सप्रेस
प्रतिनिधी / चंद्रपूर : तब्बल १८ वर्षांच्या प्रतीक्षेनंतर गोसेखुर्द प्रकल्पांतर्गत उभारण्यात आलेल्या घोडाझरी शाखा कालव्याचे काम अखेर पूर्णत्वास पोहोचले असून, कालवा पाणी वाहून नेण्यास सक्षम आहे की नाही, याची चाचणी घेण्यासाठी पाटबंधारे विभागाकडून रविवारी (किंवा सोमवारी) प्रथमच या कालव्यात पाणी सोडण्यात येणार आहे. या निर्णयामुळे नागभीडसह कालवा परिसरातील शेतकऱ्यांमध्ये आनंदाचे वातावरण असून, सिंचनाच्या आशा पुन्हा एकदा बळावल्या आहेत.

घोडाझरी शाखा कालव्याला २३ जून २००६ रोजी प्रशासकीय मान्यता मिळाली होती. त्यानंतर सुमारे दोन वर्षांनी प्रत्यक्ष कामाला सुरुवात झाली. मात्र पुनर्वसन, भूसंपादन, रेल्वे क्रॉसिंगची परवानगी, कोरोना काळातील कामबंदी आणि विविध तांत्रिक अडचणींमुळे हा महत्त्वाकांक्षी प्रकल्प तब्बल १८ वर्षे रखडला. आता कालव्याचे काम पूर्ण झाल्याने त्याच्या वहन क्षमतेची चाचणी घेण्यासाठी पाणी सोडण्याचा निर्णय घेण्यात आला आहे.

घोडाझरी शाखा कालव्याची नागभीड तालुक्यातील लांबी ५५.५५ किलोमीटर आहे. या कालव्याच्या माध्यमातून चंद्रपूर जिल्ह्यातील नागभीड, ब्रह्मपुरी, सिंदेवाही, मूल आणि सावली या पाच तालुक्यांतील ११९ गावांमधील २९ हजार ६१ हेक्टर शेती सिंचनाखाली आणण्याचे उद्दिष्ट आहे. त्यामुळे या भागातील शेतीला मोठा दिलासा मिळण्याची अपेक्षा व्यक्त होत आहे.

कालव्याच्या कामात अनेक अडथळ्यांचा सामना करावा लागला. प्रकल्पग्रस्तांचे पुनर्वसन, ४०३ हेक्टर खासगी जमिनीचे संपादन, कोरोना काळातील कामबंदी तसेच रेल्वे क्रॉसिंगच्या कामांना परवानगी मिळण्यात झालेला विलंब यामुळे प्रकल्पाचा वेग मंदावला होता. अखेर सर्व प्रक्रिया पूर्ण झाल्यानंतर कालवा पाणी सोडण्यासाठी सज्ज झाला आहे.

या कालव्यावर नागभीड तालुक्यात दोन उपसा जलसिंचन योजना प्रस्तावित आहेत. नवेगाव पांडव येथील योजनेतून ब्रह्मपुरी तालुक्यातील पाच आणि नागभीड तालुक्यातील २२ गावांमधील एकूण ४ हजार ४७३ हेक्टर क्षेत्राला सिंचनाचा लाभ मिळणार आहे. नागभीड तालुक्यात कालव्याचा काही भाग भूमिगत स्वरूपाचा असल्याने उपसा जलसिंचन योजनांद्वारेच सिंचनाचा विस्तार केला जाणार आहे.

घोडाझरी शाखा कालव्याच्या चाचणीबाबत सहाय्यक अभियंता संजय नंदनवार यांनी सांगितले की, नागभीड तालुक्यातील कालव्याचे काम पूर्ण झाले आहे. कालव्याची वहन क्षमता तपासण्यासाठी रविवारी किंवा सोमवारी प्रथमच पाणी सोडण्यात येणार आहे.

दरम्यान, पाणी किती दिवस कालव्यातून सोडले जाणार, याकडेही शेतकऱ्यांचे लक्ष लागले आहे. सध्या धान पिकाचा हंगाम सुरू असल्याने संपूर्ण हंगामभर सिंचनासाठी पाणी उपलब्ध राहावे, अशी शेतकऱ्यांची अपेक्षा आहे. नियमित पाणीपुरवठा झाल्यास हजारो हेक्टर क्षेत्रातील शेतीला मोठा आधार मिळून उत्पादनवाढीसही चालना मिळणार आहे.

ठळक बाबी :

- घोडाझरी शाखा कालव्यात प्रथमच पाण्याची चाचणी
- तब्बल १८ वर्षांनंतर प्रकल्पाचे काम पूर्ण
- ५ तालुक्यांतील ११९ गावांना सिंचनाचा लाभ
- २९ हजार ६१ हेक्टर क्षेत्र सिंचनाखाली येणार
- नागभीड तालुक्यात दोन उपसा जलसिंचन योजना प्रस्तावित
- धान हंगामासाठी नियमित पाणीपुरवठ्याची शेतकऱ्यांची अपेक्षा