Petrol Price
विसापूर परिसरात वाघाचा धुमाकूळ : गोऱ्ह्याची शिकार, शेतकऱ्यांमध्ये भीतीचे वातावरण
विदर्भ न्यूज एक्सप्रेस
तालुका प्रतिनिधी / बल्लारपूर : बल्लारपूर तालुक्यातील विसापूर, नांदगाव पोडे आणि परिसरातील शेतशिवारात वाघाची दहशत दिवसेंदिवस वाढत आहे. वाघाने मधुकर भोयर यांच्या शेतातील गोऱ्ह्याची शिकार केल्याची घटना शुक्रवार, ६ नोव्हेंबर रोजी उघडकीस आली. या घटनेमुळे परिसरातील शेतकरी आणि पशुपालकांमध्ये भीतीचे वातावरण निर्माण झाले आहे.
सकाळी ७ वाजताच्या सुमारास मधुकर भोयर शेतात गेले असता त्यांना गोऱ्हा मृतावस्थेत आढळून आला. जवळपास पाहणी केली असता वाघाने गोऱ्ह्याची शिकार केल्याचे स्पष्ट झाले. त्यांनी तत्काळ वनविभागाला घटनेची माहिती दिली. माहिती मिळताच वनविभागाच्या कर्मचाऱ्यांनी घटनास्थळी धाव घेऊन पंचनामा केला. तसेच परिसरात वाघाच्या हालचालींवर लक्ष ठेवण्यासाठी जाळीदार छायाचित्रण यंत्रे लावण्याचे आश्वासन दिले.
दरम्यान, विसापूर, नांदगाव पोडे आणि कोलगाव परिसरात मागील महिनाभरापासून वाघाची वर्दळ वाढली आहे. आठवडाभरापूर्वी सुनील जुनघरे यांच्या शेताजवळही शेतकऱ्यांना वाघाचे दर्शन झाले होते. त्यामुळे आधीच दहशतीखाली असलेल्या शेतकऱ्यांमध्ये गोऱ्ह्याच्या शिकारीमुळे अधिकच भीती पसरली आहे.
शेतशिवारात शेतीची कामे सुरू असताना वाघाचा वावर असल्याने शेतात जाणेही धोकादायक बनले आहे. वनविभागाने केवळ पंचनामा आणि आश्वासनांपुरते मर्यादित न राहता वाघाच्या हालचालींवर लक्ष ठेवून त्याचा बंदोबस्त करण्यासाठी तातडीने ठोस उपाययोजना कराव्यात, अशी मागणी परिसरातील शेतकरी आणि नागरिकांकडून होत आहे.
