Petrol Price
चंद्रपूरजवळ मालगाडीच्या धडकेत मादी सांबराचा मृत्यू : रेल्वे अपघातांत १४० हून अधिक वन्यजीवांचा बळी
विदर्भ न्यूज एक्सप्रेस
प्रतिनिधी / चंद्रपूर : बल्लारशाह गोंदिया रेल्वेमार्गावर वन्यजीवांच्या मृत्यूचे सत्र सुरूच असून, बुधवारी पहाटे मालगाडीच्या धडकेत एका मादी सांबराचा दुर्दैवी मृत्यू झाला. चंद्रपूर शहरापासून अवघ्या चार किलोमीटर अंतरावर वनविकास महामंडळाच्या जुनोना वनपरिक्षेत्रातील कक्ष क्रमांक ४८२ मध्ये ही घटना घडली. या अपघातामुळे रेल्वेमार्गावरील वन्यजीवांच्या सुरक्षिततेचा प्रश्न पुन्हा ऐरणीवर आला असून, आतापर्यंत रेल्वे अपघातांत मृत्युमुखी पडलेल्या वन्यजीवांची संख्या १४० च्या पुढे गेली आहे.
मिळालेल्या माहितीनुसार, बुधवारी पहाटे सुमारे ५.३० वाजताच्या सुमारास चांदा फोर्टच्या दिशेने जाणाऱ्या मालगाडीची मादी सांबराला जोरदार धडक बसली. या भीषण अपघातात सांबराचा जागीच मृत्यू झाला. धडकेची तीव्रता इतकी होती की, सांबराच्या शरीराचे अवशेष सुमारे १०० मीटर अंतरापर्यंत विखुरलेले आढळले. त्याचा जबडाही पूर्णपणे तुटून रेल्वे रुळावर पडलेला होता.
हॅबिटॅट कन्झर्वेशन सोसायटीचे अध्यक्ष दिनेश खाटे यांनी दिलेल्या माहितीनुसार, बल्लारशाह गोंदिया रेल्वेमार्गावर आतापर्यंत रेल्वे अपघातांत २० सांबरांसह १४० हून अधिक वन्यजीवांचा मृत्यू झाला आहे. विशेष म्हणजे, चार दिवसांपूर्वी चिचपल्लीजवळ रेल्वेच्या धडकेत एका बिबट्याच्या पिल्लाचाही मृत्यू झाला होता. सातत्याने घडणाऱ्या या घटनांमुळे वन्यजीवांच्या संरक्षणाचा प्रश्न गंभीर बनला आहे.
बल्लारशाह गोंदिया रेल्वेमार्ग हा कावल ते ताडोबा व्याघ्र प्रकल्पाला जोडणाऱ्या संवेदनशील वन्यजीव भ्रमणमार्गाच्या परिसरातून जातो. या परिसरात वन्यप्राण्यांची नियमित हालचाल होत असल्याने रेल्वेमार्ग ओलांडताना त्यांच्या जीवाला धोका निर्माण होत आहे. वन्यजीवांच्या हालचालींचा विचार करून या मार्गावर अपघात रोखण्यासाठी प्रभावी उपाययोजना करणे आवश्यक असल्याचे वन्यजीवप्रेमींचे म्हणणे आहे.
रेल्वेमार्गावर वन्यजीवांच्या अपघाती मृत्यूंचे सत्र थांबत नसल्याने परिस्थिती चिंताजनक असल्याचे दिनेश खाटे यांनी सांगितले. कावल–ताडोबा वन्यजीव भ्रमणमार्गाचे संरक्षण करणे अत्यंत गरजेचे असून, वन्यजीवांचे मृत्यू रोखण्यासाठी रेल्वे प्रशासन आणि वन विभागाने समन्वयाने ठोस उपाययोजना राबवाव्यात, असे आवाहन त्यांनी केले.
या घटनेची माहिती मिळाल्यानंतर हॅबिटॅट कन्झर्वेशन सोसायटीचे अध्यक्ष दिनेश खाटे, पिंटू उईके, अमित देशमुख, रणजित मडावी, वनविकास महामंडळाचे क्षेत्र सहाय्यक डी. जी. कांबळे, वनरक्षक आर. डी. पायपरे तसेच रेल्वे सुरक्षा बल, नागभीडचे हेड कॉन्स्टेबल सुभाष ठोंबरे घटनास्थळी उपस्थित होते. वन्यजीवांच्या वारंवार होणाऱ्या मृत्यूंमुळे बल्लारशाह गोंदिया रेल्वेमार्गावर अपघात प्रतिबंधक उपाययोजना तातडीने राबविण्याची मागणी जोर धरत आहे. रेल्वे प्रशासन आणि वन विभागाने संयुक्तपणे ठोस पावले उचलल्यास वन्यजीवांचे जीव वाचविण्यास मदत होऊ शकते.
