Petrol Price
वाईट विचारांसह अनिष्ट प्रथांचेही दहन करा : चंद्रपूर पोलिसांचा विजयादशमीला सामाजिक संदेश
विदर्भ न्यूज एक्सप्रेस
प्रतिनिधी / चंद्रपूर : विजयादशमी हा सण वाईटावर चांगल्याचा विजय मिळविण्याचे प्रतीक मानला जातो. मात्र, समाजातील वाईट विचार, अनिष्ट प्रथा आणि भेदभाव नष्ट केल्याशिवाय खऱ्या अर्थाने विजयादशमीचा संदेश सार्थ ठरणार नाही. याच विचारातून चंद्रपूर पोलिसांच्या भरोसा सेलने विजयादशमीच्या निमित्ताने समाजप्रबोधनाचा संदेश दिला आहे. हुंडा प्रथा, महिलांवरील अत्याचार, बालविवाह, जातिभेद, अंधश्रद्धा, व्यसनाधीनता आणि स्त्री-पुरुष असमानता यांसारख्या सामाजिक समस्यांचे समूळ उच्चाटन करण्याचे आवाहन करण्यात आले आहे.
चंद्रपूर पोलीस दलाच्या भरोसा सेलच्या वतीने समाजात सुरक्षितता निर्माण करण्यासोबतच महिलांचा सन्मान, बालकांचे संरक्षण आणि समानतेची भावना रुजविण्यावर भर देण्यात आला आहे. विजयादशमीला केवळ रावणाच्या पुतळ्याचे दहन न करता समाजात रुजलेल्या वाईट विचारांचे आणि अनिष्ट प्रथांचेही दहन करण्याची गरज या संदेशातून अधोरेखित करण्यात आली आहे.
हुंडा प्रथेमुळे अनेक महिलांना अन्याय सहन करावा लागतो. त्यामुळे मुलगी ही ओझे नसून अभिमान आहे, ही भावना प्रत्येक कुटुंबात रुजली पाहिजे. महिलांवरील अत्याचार रोखून त्यांचा सन्मान आणि सुरक्षितता जपली पाहिजे. बालविवाहासारख्या अनिष्ट प्रथेला आळा घालून बालपण सुरक्षित ठेवणे आणि शिक्षणाला प्राधान्य देणे आवश्यक आहे, असे आवाहन करण्यात आले आहे.
समाजात जातिभेद आणि भेदभावाला स्थान न देता माणुसकीला सर्वाधिक महत्त्व देण्याची गरजही व्यक्त करण्यात आली आहे. अंधश्रद्धा व अनिष्ट रूढींपासून दूर राहून विवेक, विज्ञान आणि संवैधानिक मूल्यांचा स्वीकार करावा. व्यसनाधीनता व गुन्हेगारीपासून मुक्त समाज घडविण्यासाठी प्रत्येकाने प्रयत्न करावेत, तसेच स्त्री-पुरुष समानतेचा विचार कृतीत उतरवून सर्वांना समान हक्क आणि संधी द्याव्यात, असा संदेश चंद्रपूर पोलिसांच्या भरोसा सेलने दिला आहे.
दहन केवळ पुतळ्याचे नको, तर मनातील वाईट विचारांचेही होऊ द्या. नाश केवळ रावणाचा नको, तर समाजातील अनिष्ट प्रथांचाही होऊ द्या, हा विजयादशमीचा खरा संदेश असल्याचे या उपक्रमातून सांगण्यात आले आहे.समाज सुरक्षित, सुसंस्कृत आणि व्यसनमुक्त बनविण्यासाठी प्रत्येक नागरिकाने वाईट विचारांचा त्याग करून अनिष्ट प्रथांना नकार द्यावा आणि सन्मान, समानता व माणुसकीचा स्वीकार करावा, असे आवाहन करण्यात आले आहे.
महिलांच्या मदतीसाठी १८१, बालकांच्या संरक्षणासाठी १०९८, आपत्कालीन मदतीसाठी ११२ आणि सायबर गुन्ह्यांच्या तक्रारींसाठी १९३० या हेल्पलाइन क्रमांकांची माहितीही देण्यात आली आहे. चंद्रपूर पोलीस दलाने या संदेशातून विजयादशमीच्या सणाला सामाजिक परिवर्तनाची जोड देत समाजातील प्रत्येक घटकाने वाईट प्रवृत्तींच्या उच्चाटनासाठी पुढाकार घेण्याचे आवाहन केले आहे.
