Petrol Price
शासकीय वसतीगृहातील विद्यार्थ्यांना आरोग्य विषयक समुपदेशन
- सेवा संकल्प अभियानांतर्गत आरोग्यविषयक जनजागृती उपक्रम
विदर्भ न्यूज एक्सप्रेस
प्रतिनिधी / वर्धा : विद्यार्थ्यांमध्ये आरोग्यविषयक जागरूकता निर्माण करण्याच्या उद्देशाने सहाय्यक आयुक्त, समाज कल्याण कार्यालयाच्या वतीने सेवा संकल्प अभियानांतर्गत देवळी येथील बाबासाहेब आंबेडकर मागासवर्गीय मुलांच्या वसतीगृहात आरोग्यविषयक समुपदेशन व जनजागृती कार्यक्रमाचे आयोजन करण्यात आले.
या कार्यक्रमात विद्यार्थ्यांना शारीरिक आरोग्य, मानसिक आरोग्य, मादक पदार्थांचे सेवन, त्याचे शरीरावर होणारे घातक परिणाम तसेच एचआयव्ही संक्रमण आणि त्यावरील उपचार पद्धती याबाबत सविस्तर मार्गदर्शन करण्यात आले. विजयकुमार ओझा यांनी विद्यार्थ्यांशी संवाद साधत आरोग्यविषयक विविध बाबींची माहिती दिली.
विद्यार्थ्यांच्या सर्वांगीण विकासासाठी शारीरिक आरोग्यासोबतच मानसिक आरोग्याची काळजी घेणे आवश्यक असल्याचे यावेळी स्पष्ट करण्यात आले. दैनंदिन जीवनात आरोग्यदायी सवयी अंगीकारणे, संतुलित आहार घेणे, स्वच्छतेची काळजी घेणे तसेच मानसिक ताणतणावाचा योग्य पद्धतीने सामना करणे याबाबतही विद्यार्थ्यांना मार्गदर्शन करण्यात आले.
मादक पदार्थांच्या सेवनामुळे व्यक्तीच्या शारीरिक आणि मानसिक आरोग्यावर गंभीर परिणाम होऊ शकतात. व्यसनाधीनतेमुळे शिक्षण, कुटुंब आणि सामाजिक जीवनावरही विपरीत परिणाम होतो. त्यामुळे विद्यार्थ्यांनी मादक पदार्थांपासून दूर राहून निरोगी व सकारात्मक जीवनशैली स्वीकारावी, असे आवाहन करण्यात आले.
यावेळी एचआयव्ही संक्रमणाबाबतही विद्यार्थ्यांमध्ये जनजागृती करण्यात आली. एचआयव्ही संक्रमणाची कारणे, प्रतिबंधात्मक उपाय, तपासणीचे महत्त्व तसेच उपलब्ध उपचार पद्धती याबाबत माहिती देण्यात आली. एचआयव्हीबाबत समाजात असलेल्या गैरसमजुती दूर करून योग्य आणि शास्त्रीय माहिती विद्यार्थ्यांपर्यंत पोहोचविण्यावर भर देण्यात आला.
सेवा संकल्प अभियानाच्या माध्यमातून विद्यार्थ्यांना आरोग्यविषयक योग्य माहिती मिळावी, त्यांनी आरोग्याबाबत सजग राहावे आणि भविष्यात निरोगी जीवनशैलीचा स्वीकार करावा, हा या उपक्रमाचा प्रमुख उद्देश होता. कार्यक्रमाला वसतीगृहातील विद्यार्थी, गृहपाल सुरज छाडी यांच्यासह संबंधित अधिकारी व कर्मचारी उपस्थित होते. कार्यक्रमादरम्यान विद्यार्थ्यांनी आरोग्यविषयक विविध बाबींवर मार्गदर्शन घेतले.
