Petrol Price
महाराष्ट्र अॅग्रीबिझनेस नेटवर्क प्रकल्पाच्या माध्यमातून शेतकऱ्यांना मूल्यवर्धन व बाजारपेठेशी जोडण्यास चालना
विदर्भ न्यूज एक्सप्रेस
प्रतिनिधी / वर्धा : फलोत्पादन क्षेत्रातील शेतकरी, शेतकरी उत्पादक कंपन्या व मूल्यसाखळीतील विविध घटकांना सक्षम करून शेतमालाला अधिक चांगली बाजारपेठ उपलब्ध करून देण्यासाठी सहकार, पणन व वस्रोद्योग विभागामार्फत तसेच आशियाई विकास बँकेच्या अर्थसहाय्याने महाराष्ट्र अॅग्रोबिझनेस नेटवर्क प्रकल्प राबविण्यात येत आहे. जिल्ह्यातील पात्र शेतकरी, उत्पादक कंपन्या, सहकारी संस्था व मूल्यसाखळीतील संबंधित घटकांनी या प्रकल्पांतर्गत उपलब्ध असलेल्या प्रशिक्षण, क्षमता बांधणी, वित्तीय सहाय्य, मूल्यवर्धन व बाजारपेठ जोडणीच्या संधीचा लाभ घ्यावा, असे आवाहन करण्यात आले आहे.
प्रकल्पांतर्गत शेतमालाच्या उत्पादनापासून ते काढणीनंतरचे व्यवस्थापन, प्रक्रिया, मूल्यवर्धन, साठवणूक, वाहतूक व विपणन या संपूर्ण मूल्यसाखळीला बळकटी देण्यावर भर देण्यात येत आहे. तसेच शेतकरी उत्पादक संस्था व मूल्यसाखळीतील घटकांची क्षमता वाढविणे, आधुनिक तंत्रज्ञानाचा वापर वाढविणे आणि बाजारपेठेशी थेट जोडणी निर्माण करणे यासाठी विविध उपक्रम राबविण्यात येणार आहे.
प्रकल्पामध्ये शेतकरी उत्पादक संस्था यांची क्षमता वाढविणे, फलोत्पादन पिकांच्या मूल्यसाखळीचा विकास करणे, काढणीनंतरचे व्यवस्थापन व शेतमालाची गुणवत्ता सुधारण्यासाठी सुविधा निर्माण करणे, प्रक्रिया व मूल्यवर्धनाला प्रोत्साहन देणे, शेतकरी उत्पादक संस्था व मूल्यसाखळीतील पटकांना वित्तीय सहाय्य उपलब्ध करून देणे, शेतमालासाठी देशांतर्गत तसेच निर्यात बाजारपेठेच्या संधी वाढविणे, आधुनिक तंत्रज्ञान व उत्तम कृषी पद्धतींचा अवलंब करण्यास प्रोत्साहन देणे, शेतमालातील काढणीनंतरचे नुकसान कमी करून शेतकऱ्यांच्या उत्पन्नवाढीस सहाय्य करणे या बाबीचा समावेश करण्यात आला आहे.
प्रकल्पामध्ये सुरुवातीला डाळिंब, केळी, संत्रा, मोसंबी, सीताफळ, पेरू, चिकू, स्ट्रॉबेरी, भेंडी, हिरवी व लाल मिरची तसेच फुलपिकांचा समावेश करण्यात आला होता. त्यानंतर आंबा, काजू, लिंबू व पडवळ या पिकांचा समावेश करण्यात आला आहे. या टप्प्यात द्राक्षे, पपई, हळद, अंजीर, शेवगा, टोमॅटो, आले व फणस या आणखी ८ पिकाचा समावेश करण्यात आला आहे. पायाभूत सुविधा, वित्तीय व संस्थात्मक सहाय्याचा विस्तार तसेच फलोत्पादन पिकांच्या निर्यातीला चालना देण्यावर विशेष भर देण्यात येणार आहे, असे जिल्हा अधिक्षक कृषि अधिकारी यांनी कळविले आहे.
