Petrol Price
सोमनाळा येथे लोकसंवाद मधून महिला व बालकांच्या संरक्षणाबाबत जनजागृती
- शासकीय योजनांची माहिती देत नागरिकांशी साधला थेट संवाद
विदर्भ न्यूज एक्सप्रेस
प्रतिनिधी / भंडारा : शासनाच्या विविध लोककल्याणकारी योजना आणि उपक्रमांची माहिती थेट नागरिकांपर्यंत पोहोचविण्याच्या उद्देशाने माहिती व जनसंपर्काच्या विशेष उपक्रमांतर्गत सोमनाळा येथील बाल गणेश उत्सव मंडळात लोकसंवाद कार्यक्रम उत्साहात पार पडला. महिला व बालकांचे संरक्षण, दत्तक प्रक्रियेतील कायदेशीर बाबी तसेच विविध शासकीय योजनांबाबत यावेळी नागरिकांना मार्गदर्शन करण्यात आले.
महिला व बालविकास विभागाच्या संरक्षण अधिकारी प्रियंका पशीने यांनी महिला व बालकांसाठी शासनामार्फत राबविण्यात येणाऱ्या विविध योजनांची माहिती दिली. बालकांच्या संरक्षणासाठी उपलब्ध असलेल्या शासकीय यंत्रणा, बालकांवरील अत्याचार, बालविवाह, बालमजुरी व बालकांशी संबंधित अन्य गुन्ह्यांपासून संरक्षणासाठी घ्यावयाची दक्षता याबाबत त्यांनी मार्गदर्शन केले.
बालकांच्या सुरक्षिततेसाठी पालक, महिला आणि नागरिकांनी सजग राहण्याचे आवाहन त्यांनी केले. दत्तक प्रक्रियेबाबत मार्गदर्शन करताना बालक दत्तक घेणे अथवा देणे ही प्रक्रिया शासनाने निर्धारित केलेल्या अधिकृत यंत्रणेमार्फतच करणे आवश्यक असल्याचे त्यांनी स्पष्ट केले. अनधिकृत पद्धतीने दत्तक प्रक्रिया केल्यास बालकांच्या हक्कांना बाधा पोहोचण्यासह कायदेशीर अडचणी निर्माण होऊ शकतात. त्यामुळे नागरिकांनी अशा प्रकारच्या अनधिकृत प्रक्रियेपासून दूर राहून अधिकृत यंत्रणेशी संपर्क साधावा, असे आवाहन करण्यात आले.
आदिवासी विकास विभागाचे गृहपाल धनंजय मेश्राम यांनी आदिवासी विकास विभागामार्फत राबविण्यात येणाऱ्या विविध योजना व विद्यार्थ्यांसाठी उपलब्ध सुविधांची माहिती दिली. पंचायत समितीचे विस्तार अधिकारी कमलेश कावळकर यांनी पंचायत समितीमार्फत राबविण्यात येणाऱ्या विविध शासकीय योजनांची माहिती नागरिकांना दिली.
जिल्हा माहिती अधिकारी शैलजा वाघ यांच्या मार्गदर्शनाखाली आयोजित करण्यात आलेल्या या कार्यक्रमासाठी दिगंबर वंजारी यांचे विशेष सहकार्य लाभले. यावेळी गावातील महिला, बालके आणि नागरिक मोठ्या संख्येने उपस्थित होते.
लोकसंवाद मालिकेतील हा पाचवा कार्यक्रम असून, या उपक्रमाला नागरिकांचा उत्स्फूर्त प्रतिसाद मिळत आहे. शासनाच्या योजना, सेवा व लोककल्याणकारी उपक्रमांची माहिती थेट नागरिकांपर्यंत पोहोचविण्यासोबतच नागरिकांच्या प्रश्नांना योग्य मार्गदर्शन मिळावे आणि शासन व नागरिक यांच्यातील संवाद अधिक प्रभावी व्हावा, या उद्देशाने लोकसंवाद उपक्रम राबविण्यात येत आहे.
