Petrol Price
तुरीसोबत हळदीचे आंतरपीक : कृषी अधीक्षकांकडून प्रयोगाची पाहणी
विदर्भ न्यूज एक्सप्रेस
प्रतिनिधी / वर्धा : एक जिल्हा, एक पीक उपक्रमांतर्गत वर्धा जिल्ह्यासाठी हळद पिकाची निवड करण्यात आली आहे. जिल्ह्यात हळदीचे क्षेत्र वाढवून उत्पादनाला चालना देण्यासाठी कृषी विभागाकडून विविध पातळ्यांवर प्रयत्न सुरू आहेत. या उपक्रमाला पूरक ठरणाऱ्या प्रयोगांना प्रोत्साहन देण्यासाठी कृषी विभागाने पुढाकार घेतला असून, एका शेतकऱ्याने तूर पिकात आंतरपीक म्हणून केलेल्या हळद लागवडीची जिल्हा कृषी अधीक्षक अरविंद उपरीकर यांनी पाहणी केली. या प्रयोगाची माहिती जाणून घेत त्यांनी शेतकऱ्याच्या प्रयत्नांचे कौतुक केले.
तूर पिकामध्ये आंतरपीक म्हणून हळदीची लागवड करण्यात आली आहे. एकाच शेतात दोन पिके घेतल्यामुळे उपलब्ध जमिनीचा अधिक चांगल्या पद्धतीने वापर होण्यास मदत होते. त्याचबरोबर पीक विविधीकरण साधता येते आणि एका पिकाच्या उत्पादनावर किंवा बाजारभावावर शेतकऱ्याचे संपूर्ण उत्पन्न अवलंबून राहत नाही. तूर आणि हळद या दोन्ही पिकांचे योग्य नियोजन व व्यवस्थापन केल्यास एकाच क्षेत्रातून दोन पिकांचे उत्पादन घेण्याची संधी मिळू शकते.
हळद पिकाची पाहणी -
जिल्हा कृषी अधीक्षक अरविंद उपरीकर यांनी शेतातील हळद पिकाची वाढ, पिकाची सद्यस्थिती आणि आंतरपीक पद्धतीची माहिती घेतली. तुरीसोबत हळद घेताना लागवड पद्धत, पीक व्यवस्थापन, पाण्याचे नियोजन आणि उत्पादनाच्या दृष्टीने आवश्यक बाबींवरही चर्चा करण्यात आली.
एक जिल्हा, एक पीक उपक्रमांतर्गत हळदीची निवड करण्यात आल्याने जिल्ह्यात या पिकाच्या उत्पादनवाढीवर भर देण्यात येत आहे. शेतकऱ्यांनी पारंपरिक पिकांसोबत नवीन पिकांचा प्रयोग करून उत्पन्नाचे पर्यायी स्रोत निर्माण करावेत, यासाठी कृषी विभागाकडून मार्गदर्शन केले जात आहे.
हळद ठरू शकते फायदेशीर पर्यायी पीक -
हळद हे मसाला पिकासोबतच औषधी गुणधर्म असलेले महत्त्वाचे पीक आहे. हळदीमध्ये असलेल्या ‘कुरकुमिन’ या घटकामुळे अन्नप्रक्रिया, आयुर्वेद, औषधनिर्मिती, सौंदर्यप्रसाधने तसेच विविध उद्योगांमध्ये हळदीला मागणी आहे. त्यामुळे बाजारपेठेचा योग्य अभ्यास करून हळदीचे उत्पादन घेतल्यास शेतकऱ्यांना उत्पन्नाचे नवीन साधन मिळू शकते.
मात्र, हळद लागवडीपूर्वी शेतकऱ्यांनी स्थानिक बाजारातील मागणी व संभाव्य दर, उत्पादन खर्च, प्रक्रिया सुविधा, साठवणुकीची उपलब्धता आणि विक्रीची व्यवस्था यांचा विचार करणे आवश्यक आहे. उत्पादनासोबतच बाजारपेठेचे योग्य नियोजन केल्यास हे पीक अधिक फायदेशीर ठरू शकते.
फुलविक्रीसाठी जागा देण्याचे आश्वासन -
पाहणीदरम्यान फुलशेती उत्पादक नितीन भोयर यांनी वर्धा शहरात फुलविक्रीसाठी स्वतंत्र बाजारपेठ अथवा जागा उपलब्ध करून देण्याची मागणी जिल्हा कृषी अधीक्षकांकडे केली. यावर कृषी अधीक्षक कार्यालयासमोरील उपलब्ध जागेचा फुलविक्रीसाठी उपयोग करू देण्याचे आश्वासन अरविंद उपरीकर यांनी दिले.
याशिवाय प्रायोगिक तत्त्वावर सूर्यफुलाचे बियाणे कृषी विभागाच्या वतीने उपलब्ध करून देण्याची घोषणाही उपरीकर यांनी उपस्थित शेतकऱ्यांना केली. पीक विविधीकरणाला चालना देण्यासाठी अशा प्रयोगांना प्रोत्साहन देण्याची भूमिका कृषी विभागाने घेतली आहे.
या वेळी मंडळ कृषी अधिकारी सुभाष मुंढे, कृषी सहाय्यक दीपाली वैद्य, गुरुदेव शेतकरी उत्पादक गटाचे नितीन भोयर, अनुप चांदनखेडे, जानिक काळबांडे, प्रशांत भोयर, उमेश उमाटे, संजय आदमने, दिलीप उमाटे, सुरेश इखार आदी उपस्थित होते.
