Petrol Price
भंडारा जिल्ह्यात डॉल्बी, प्लाझ्मा साऊंडवर निर्बंध
- उत्सवांच्या पार्श्वभूमीवर जिल्हादंडाधिकाऱ्यांची अधिसूचना; ४ सप्टेंबरपासून १ नोव्हेंबरपर्यंत आदेश लागू
विदर्भ न्यूज एक्सप्रेस
प्रतिनिधी / भंडारा : आगामी उत्सवांच्या पार्श्वभूमीवर जिल्ह्यात कायदा व सुव्यवस्था तसेच सार्वजनिक शांतता अबाधित राखण्यासाठी जिल्हा प्रशासनाने डॉल्बी साऊंडसह प्लाझ्मा साऊंड सिस्टीम, प्रीमियम साऊंड सिस्टीम आणि तत्सम ध्वनीप्रणालींच्या वापरावर निर्बंध घातले आहेत. भारतीय नागरिक सुरक्षा संहिता, २०२३ मधील कलम १६३ अन्वये जिल्हाधिकारी तथा जिल्हादंडाधिकारी सावन कुमार यांनी यासंदर्भात अधिसूचना जारी केली आहे.
भंडारा जिल्ह्यात आगामी काळात दहीहंडी, पोळा, तान्हापोळा, ताजीयाबाबा छब्बीसवी, गणेशोत्सव, गणेशमूर्ती आगमन व विसर्जन मिरवणुका, विविध गणेशोत्सव मंडळांचे कार्यक्रम तसेच धम्मचक्र प्रवर्तन दिन आदी उत्सव साजरे होणार आहेत. या उत्सवांच्या काळात मोठ्या प्रमाणावर ध्वनीप्रणालींचा वापर होण्याची शक्यता आहे. त्यामुळे ध्वनीप्रदूषण वाढून नागरिकांना त्रास होण्यासोबतच सार्वजनिक शांतता व कायदा-सुव्यवस्थेचा प्रश्न निर्माण होऊ नये, यासाठी प्रशासनाने हा प्रतिबंधात्मक आदेश जारी केला आहे.
- वाहनांवर ध्वनीप्रणाली वापरण्यास मनाई
अधिसूचनेनुसार, उत्सवांच्या कालावधीत डॉल्बी साऊंड, टॉप, मिड, बेस आदी मल्टीस्पीकर, प्लाझ्मा साऊंड सिस्टीम, प्रीमियम साऊंड सिस्टीम तसेच तत्सम ध्वनीप्रणालींचा वाहनांवर वापर करण्यास प्रतिबंध करण्यात आला आहे. यासोबतच अशा ध्वनीप्रणालींच्या वापरासाठी वाहनांमध्ये कोणत्याही प्रकारचे बदल अथवा ‘मॉडिफिकेशन’ करण्यासही मनाई करण्यात आली आहे. त्यामुळे उत्सवांच्या मिरवणुकांसाठी किंवा अन्य सार्वजनिक कार्यक्रमांसाठी वाहनांमध्ये मोठ्या क्षमतेच्या ध्वनीप्रणाली बसविणाऱ्या संबंधितांना प्रशासनाच्या या आदेशाचे पालन करावे लागणार आहे.
विविध उत्सवांच्या पार्श्वभूमीवर निर्णय -
दहीहंडी, पोळा, तान्हापोळा आणि ताजीयाबाबा छब्बीसवी यासह गणेशोत्सवाच्या काळात विविध ठिकाणी धार्मिक व सांस्कृतिक कार्यक्रमांचे आयोजन केले जाते. गणेशमूर्ती आगमन आणि विसर्जन मिरवणुकांमध्येही ध्वनीप्रणालींचा मोठ्या प्रमाणात वापर होण्याची शक्यता असते. याशिवाय गणेशोत्सव मंडळांचे कार्यक्रम आणि धम्मचक्र प्रवर्तन दिनाच्या कार्यक्रमांमध्येही मोठी गर्दी होण्याची शक्यता आहे. या पार्श्वभूमीवर ध्वनीप्रदूषणाला आळा घालणे, नागरिकांना होणारा त्रास कमी करणे आणि उत्सवांच्या काळात सार्वजनिक शांतता व कायदा-सुव्यवस्था कायम ठेवणे, या उद्देशाने जिल्हा प्रशासनाने निर्बंध लागू केले आहेत.
जवळपास दोन महिन्यांसाठी आदेश -
ही अधिसूचना ४ सप्टेंबर २०२६ रोजी रात्री २४.०० वाजल्यापासून लागू झाली असून १ नोव्हेंबर २०२६ रोजी रात्री २३.५९ वाजेपर्यंत लागू राहणार आहे. त्यामुळे या कालावधीत जिल्ह्यात होणाऱ्या संबंधित उत्सव, मिरवणुका व सार्वजनिक कार्यक्रमांमध्ये अधिसूचनेतील तरतुदींचे पालन करणे बंधनकारक राहणार आहे.
ध्वनीमर्यादा पाळणाऱ्या साऊंड सिस्टीमना सूट -
दरम्यान, प्रशासनाने सर्व प्रकारच्या ध्वनीप्रणालींवर सरसकट बंदी घातलेली नाही. ध्वनी प्रदूषण विनियमन व नियंत्र) नियम, २००० मध्ये नमूद केलेल्या ध्वनी मर्यादेचे उल्लंघन न करणाऱ्या साऊंड सिस्टीमना या अधिसूचनेतून सूट देण्यात आली आहे. म्हणजेच निर्धारित ध्वनीमर्यादेत राहून वापरल्या जाणाऱ्या साऊंड सिस्टीमना या आदेशातून सूट राहणार आहे. मात्र, अधिसूचनेत स्पष्टपणे नमूद केलेल्या डॉल्बी, प्लाझ्मा, प्रीमियम आणि तत्सम ध्वनीप्रणालींच्या वाहनांवरील वापराबाबतचे निर्बंध लागू राहतील.
आदेशाचे उल्लंघन केल्यास कारवाई -
अधिसूचनेतील कोणत्याही अटी व शर्तींचे उल्लंघन करणाऱ्यांविरुद्ध भारतीय नागरिक सुरक्षा संहितेनुसार योग्य ती कायदेशीर कारवाई करण्यात येईल, असे जिल्हादंडाधिकारी सावन कुमार यांनी स्पष्ट केले आहे. आगामी उत्सव उत्साहात साजरे करताना सार्वजनिक शांतता, नागरिकांची सुरक्षितता आणि कायदा-सुव्यवस्था यांना बाधा येऊ नये, यासाठी आयोजक, मंडळे तसेच संबंधितांनी प्रशासनाच्या आदेशाचे पालन करणे अपेक्षित आहे.
