महत्वाच्या बातम्या

माओवादविरोधी अभियानातील उत्कृष्ट कामगिरीचा गौरव : गडचिरोलीतील पाच सहाय्यक पोलीस निरीक्षकांना वेगवर्धित पदोन्नती

- मुंबईत पोलीस महासंचालक सदानंद दाते यांच्या हस्ते पिपिंग समारंभ; गडचिरोली पोलीस दलातील आतापर्यंत ४०४ अधिकारी-अंमलदारांना लाभ

विदर्भ न्यूज एक्सप्रेस
वृत्तसंस्था / मुंबई (गडचिरोली) : माओवादविरोधी अभियानात धाडस, शौर्य, कर्तव्यनिष्ठा आणि उल्लेखनीय कामगिरीची दखल घेत गडचिरोली पोलीस दलातील पाच सहाय्यक पोलीस निरीक्षकांना पोलीस निरीक्षक पदावर वेगवर्धित पदोन्नती देण्यात आली आहे. गृह विभागाच्या मान्यतेनंतर महाराष्ट्राचे पोलीस महासंचालक सदानंद दाते यांच्या हस्ते शुक्रवारी (३ जुलै) मुंबई येथील पोलीस महासंचालक कार्यालयात आयोजित पिपिंग समारंभात पदोन्नतीप्राप्त अधिकाऱ्यांचा सन्मान करण्यात आला.

माओवादप्रभावित आणि अतिसंवेदनशील म्हणून ओळखल्या जाणाऱ्या गडचिरोली जिल्ह्यात अत्यंत प्रतिकूल परिस्थितीत सेवा बजावताना दाखविलेल्या धैर्य, शिस्त, प्रामाणिकपणा आणि समर्पणाच्या भावनेचा गौरव म्हणून ही वेगवर्धित पदोन्नती प्रदान करण्यात आली. या सन्मानामुळे पोलीस दलातील अधिकारी आणि कर्मचाऱ्यांचे मनोबल उंचावण्याबरोबरच उत्कृष्ट कार्याला प्रोत्साहन मिळणार असल्याचे मानले जात आहे.

पदोन्नती प्राप्त झालेल्या अधिकाऱ्यांमध्ये योगिराज जाधव, सचिन झनक, बाबासाहेब दुधाळ, सुनील बागल आणि राहुल देव्हडे यांचा समावेश आहे. पिपिंग समारंभात पोलीस महासंचालक सदानंद दाते यांनी त्यांच्या खांद्यावर पोलीस निरीक्षक पदाची चिन्हे लावून त्यांचा गौरव केला. यावेळी उपस्थित वरिष्ठ अधिकाऱ्यांनी सर्व पदोन्नतीप्राप्त अधिकाऱ्यांचे अभिनंदन करून त्यांच्या भावी सेवेसाठी शुभेच्छा दिल्या.

समारंभात मार्गदर्शन करताना पोलीस महासंचालक सदानंद दाते यांनी माओवादविरोधी अभियानात कार्यरत अधिकाऱ्यांनी अत्यंत दुर्गम, संवेदनशील आणि आव्हानात्मक परिस्थितीत बजावलेल्या कर्तव्याचे विशेष कौतुक केले. उत्कृष्ट कार्याचा योग्य सन्मान होत असल्याने पोलीस दलात गुणवत्ता, शौर्य आणि कर्तव्यनिष्ठेला अधिक बळ मिळत असल्याची भावना त्यांनी व्यक्त केली. यावेळी त्यांनी पदोन्नतीप्राप्त अधिकाऱ्यांशी माओवादविरोधी अभियानातील अनुभव, विविध आव्हाने आणि कार्यपद्धती याबाबतही संवाद साधला.

गडचिरोली पोलीस दलाने माओवादविरोधी अभियानात सातत्याने उल्लेखनीय कामगिरी नोंदवली असून, त्याची दखल विविध राष्ट्रीय आणि राज्यस्तरीय पुरस्कारांच्या माध्यमातून घेण्यात आली आहे. आजपर्यंत या दलाला ३ शौर्यचक्र, ६ राष्ट्रपती पोलीस शौर्य पदके, ३३८ पोलीस शौर्य पदके, २० राष्ट्रपती पोलीस गुणवत्ता सेवा पदके, १,५१० पोलीस महासंचालक पदके प्राप्त झाली आहेत. तसेच ४०४ पोलीस अधिकारी व अंमलदारांना वेगवर्धित पदोन्नती मिळाल्याने गडचिरोली पोलीस दलाची कार्यक्षमता आणि शौर्य पुन्हा अधोरेखित झाले आहे.

या पिपिंग समारंभाला अपर पोलीस महासंचालक (एटीएस) नवल बजाज, अपर पोलीस महासंचालक (कायदा व सुव्यवस्था) डॉ. निखिल गुप्ता, राज्य गुप्तवार्ता विभागाचे आयुक्त शिरीष जैन, अपर पोलीस महासंचालक (सायबर) यशस्वी यादव, अपर पोलीस महासंचालक (विशेष कृती) डॉ. छेरिंग दोरजे, सहाय्यक पोलीस महानिरीक्षक (कायदा व सुव्यवस्था) सागर पाटील, पोलीस अधीक्षक (डायल ११२) प्रशांत मोहिते तसेच गडचिरोलीचे पोलीस अधीक्षक एम. रमेश उपस्थित होते.

यावेळी पोलीस अधीक्षक एम. रमेश यांनीही पदोन्नतीप्राप्त अधिकाऱ्यांचे अभिनंदन करत त्यांच्या शौर्य, समर्पण आणि कर्तव्यनिष्ठेचे कौतुक केले. भविष्यातही त्याच जिद्दीने आणि व्यावसायिकतेने जनतेच्या सुरक्षेसाठी कार्यरत राहून गडचिरोली जिल्ह्यात शांतता, सुरक्षितता आणि कायदा-सुव्यवस्था अधिक बळकट करण्यासाठी योगदान द्यावे, अशा शुभेच्छाही त्यांनी दिल्या.

गडचिरोली पोलीस दलातील पाच अधिकाऱ्यांना मिळालेली ही वेगवर्धित पदोन्नती ही केवळ त्यांच्या वैयक्तिक कार्याचा गौरव नसून माओवादविरोधी अभियानात योगदान देणाऱ्या संपूर्ण गडचिरोली पोलीस दलाच्या शौर्य, समर्पण आणि कर्तव्यनिष्ठेचा सन्मान असल्याची भावना यावेळी व्यक्त करण्यात आली.