Petrol Price
रंगताली गरबा महोत्सवाची नेत्रदीपक आतषबाजीत सांगता : कुलदीप रविदास गरबा किंग, तर साहिबा ओसवाल गरबा क्वीन
विदर्भ न्यूज एक्सप्रेस
तालुका प्रतिनिधी / बल्लारपूर : काँग्रेस पक्षाच्या माजी राज्य महिला सचिव तथा ज्येष्ठ नेत्या डॉ. राजनीताई हजारे यांच्या मार्गदर्शनाखाली आणि नेतृत्वात आयोजित रंगताली गरबा महोत्सवाची शुक्रवारी रात्री नेत्रदीपक आतषबाजीने उत्साहपूर्ण सांगता झाली. या महोत्सवात विविध गटांतील स्पर्धकांनी आपल्या नृत्यकौशल्याने उपस्थितांची मने जिंकली. गरब्याच्या तालावर रंगलेल्या या सोहळ्यात विजेत्यांची घोषणा करण्यात आली. विजेत्यांना डॉ. राजनीताई हजारे यांच्या हस्ते पारितोषिके प्रदान करून गौरविण्यात आले.
या महोत्सवात कुलदीप रविदास याला गरबा किंग, तर साहिबा ओसवाल हिला गरबा क्वीन हा किताब मिळाला. समूह नृत्य प्रकारात स्नॅप डान्स ग्रुपने प्रथम पारितोषिक पटकावले. लहान मुलांच्या गटात पारुल नार्वे, महिलांच्या गटात वैशाली ठाकरे, सामान्य गटात गणेश मुक्के, मुलींच्या एकल नृत्य गटात वैदेही आणि मुलांच्या गटात अभय पिंपळे यांनी प्रथम क्रमांक मिळविला. जोडप्यांच्या गटात सार्थक चौधरी आणि लावण्या पोर्टे यांनी प्रथम पारितोषिक पटकावले.
बक्षीस वितरण समारंभाला बल्लारपूर नगर परिषदेच्या नगराध्यक्षा डॉ. अल्का वाढई, सीडीसीसी बँकेचे संचालक डॉ. अनिल वाढई, शिवसेनेचे नेते घनश्याम मूलचंदानी, नगर परिषदेचे उपाध्यक्ष देवेंद्र आर्य, गटनेते अब्दुल करीम, नगरसेवक इस्माईल ढाकवाला, नगरसेवक भास्कर माकोडे यांच्यासह अनेक मान्यवर उपस्थित होते.
रंगताली गरबा महोत्सवाच्या माध्यमातून शहरातील गरबाप्रेमींना आपली कला सादर करण्याची संधी मिळाली. लहान मुलांपासून ते महिला आणि युवकांपर्यंत विविध वयोगटांतील स्पर्धकांनी उत्स्फूर्त सहभाग नोंदविला. संपूर्ण महोत्सवात उत्साह, आनंद आणि गरब्याचा जल्लोष पाहायला मिळाला. अखेर नेत्रदीपक आतषबाजीने या महोत्सवाची दिमाखदार सांगता झाली.
