Petrol Price
कामगारांच्या हक्कांसाठी मनसे आक्रमक : बल्लारपूर चा मजीप्रा विरोधात आंदोलनाचा इशारा
विदर्भ न्यूज एक्सप्रेस
तालुका प्रतिनिधी / बल्लारपूर : महाराष्ट्र जीवन प्राधिकरण बल्लारपूर येथे मागील २५ ते ३० वर्षांपासून सातत्याने सेवा बजावणाऱ्या दीर्घसेवी कामगारांना तातडीने कायमस्वरूपी सेवेत सामावून घ्यावे, अशी मागणी महाराष्ट्र नवनिर्माण कामगार सेनेने केली आहे. यासंदर्भात संघटनेच्या वतीने प्रशासनाला आंदोलनाचा इशारा देण्यात आला.
कामगारांच्या म्हणण्यानुसार, युनियन स्थापन झाल्यानंतर मागील दोन महिन्यांपासून काही कामगारांचे वेतन बँक खात्यात जमा होत आहे. मात्र, हे वेतन केवळ १० ते ११ हजार रुपयांच्या आसपास असल्याने कामगारांमध्ये नाराजी आहे. त्यामुळे कामगारांच्या हजेरीपट, वेतन नोंदवही तसेच कंत्राटदाराकडून सादर करण्यात आलेल्या बिलांची सखोल तपासणी करावी, अशी मागणी करण्यात आली.
वेतन अदा करण्यात अनियमितता आढळल्यास संबंधित कंत्राटदाराकडून कामगारांची थकीत व हक्काची संपूर्ण रक्कम वसूल करून ती कामगारांना देण्यात यावी. तसेच गंभीर आर्थिक अनियमितता आढळल्यास संबंधित कंत्राटदाराचा करार नियमानुसार रद्द करून पात्र कंत्राटदाराची नियुक्ती करावी, अशी मागणी अमन अंधेवार यांनी केली.
कामगारांना त्यांच्या पद, कामाचे स्वरूप आणि शासनमान्य वेतनश्रेणीनुसार पूर्ण वेतन द्यावे, वेतन थेट बँक खात्यात जमा करून नियमित वेतन पावती द्यावी. तसेच पीएफ आणि ईएसआयसीच्या नोंदी व कपाती नियमानुसार होत आहेत की नाही, याची खातरजमा करावी, अशी मागणीही संघटनेने केली.
युनियनमध्ये सहभागी झाल्यामुळे कोणत्याही कामगारावर दबाव, धमकी अथवा अन्यायकारक कारवाई करण्यात येऊ नये. कामगार विभागाने या संपूर्ण प्रकरणाची निष्पक्ष चौकशी करून कामगारांना न्याय द्यावा. मागण्या मान्य न झाल्यास महाराष्ट्र नवनिर्माण कामगार सेनेच्या वतीने तीव्र आंदोलन छेडण्यात येईल, असा इशारा यावेळी देण्यात आला.
