महत्वाच्या बातम्या

१५ दिवसांपासून बेपत्ता असलेल्या व्यक्तीचा मृतदेह झाडाला लटकलेल्या अवस्थेत आढळला

विदर्भ न्यूज एक्सप्रेस
प्रतिनिधी / भंडारा : तुमसर तालुक्यातील नाका डोंगरी वनपरिक्षेत्रातील लोभी जंगल परिसरात ३० मार्च रोजी एका झाडाला लटकलेल्या मृतदेह आढळल्याने परिसरात खळबळ उडाली आहे. मृतदेह पूर्णतः कुजलेल्या अवस्थेत असल्याने परिसरात तीव्र दुर्गंधी पसरली होती.

घटना पहिल्यांदा वनपरिसरात फेरफटका मारत असलेल्या नागरिकांना लक्षात आली. त्यांनी तात्काळ स्थानिक प्रशासन आणि पोलीस यंत्रणेला याबाबत माहिती दिली. सुरुवातीला मृत व्यक्तीची ओळख पटवणे शक्य झाले नाही, परंतु पोलिसांनी परिसरातील बेपत्ता व्यक्तींच्या नोंदींचा तपास केला. त्यानुसार मृत व्यक्ती राजकुमार लखीचंद नेवारे (वय ३८, तुमसर) असल्याचे स्पष्ट झाले. राजकुमार नेवारे मागील १५ दिवसांपासून बेपत्ता होता.

पोलिसांनी घटनास्थळी पोहोचून तपास सुरु केला असून, मृतदेहाची कुजलेली अवस्था लक्षात घेता अचूक मृत्यूचे कारण ठरवण्यासाठी पोस्टमॉर्टम अहवालाची प्रतीक्षा केली जात आहे.

स्थानिक रहिवाशांनी या घटनेनंतर जंगल परिसरात अधिक सावधगिरी बाळगण्याचे आवाहन केले आहे. पोलिसांनी नागरिकांना जंगलात एकट्याने फिरण्याचे टाळण्याचेही सूचना दिल्या आहेत.

तपास अधिकृतरित्या पूर्ण झाल्यानंतरच मृत्यूची खरी कारणे समोर येतील.