महत्वाच्या बातम्या

नागपुरात गंगाधरराव फडणवीस मेमोरियल डायग्नोस्टिक सेंटरचे भव्य लोकार्पण

विदर्भ न्यूज एक्सप्रेस
प्रतिनिधी / नागपुर : नागपूर शहरात समाजसेवेच्या एका महत्त्वपूर्ण उपक्रमाचे स्वरूप साकारले गेले, जे म्हणजे गंगाधरराव फडणवीस मेमोरियल डायग्नोस्टिक सेंटरचे लोकार्पण. हा भव्य सोहळा श्रीराम नगर, पावनभूमी मैदान, सोमलवाडा येथे सिद्धि विनायक सेवा फाऊंडेशन, नागपूर यांच्या वतीने पार पडला.

या सोहळ्याचे उद्घाटन सरसंघचालक प.पु. डॉ. मोहनजी भागवत, मुख्यमंत्री देवेंद्र फडणवीस, व केंद्रीय मंत्री नितिन गडकरी यांच्या शुभहस्ते करण्यात आले. सोहळ्यात महसूल मंत्री चंद्रशेखर बावनकुळे, कौशल्य मंत्री मंगल प्रभात लोधा, राज्यमंत्री पंकज भोयर, राज्यमंत्री आशिष जैस्वाल, नागपूर महापौर निता ठाकरे, राज्यसभा खासदार माया इवनाते, माजी खासदार व राष्ट्रीय महामंत्री भाजप अनुसूचित जनजाती मोर्चा डॉ. अशोक नेते, माजी आमदार सुधाकर कोहळे यांसह अनेक मान्यवर आणि पदाधिकारी मोठ्या संख्येने उपस्थित होते.

या उपक्रमामागील महत्त्वाचे सूत्र केंद्रीय मंत्री नितिन गडकरी यांच्या संकल्पनेतून आणि मुख्यमंत्री देवेंद्र फडणवीस यांच्या विशेष प्रयत्नांमुळे साकार झाले. आमदार संदीप जोशी यांच्या विचारातून हे सेवा केंद्र उभे राहिले असून, सेवा हीच सर्वोच्च धर्म या भावनेतून हे कार्य साकारले गेले आहे.

सोहळ्याची सुरुवात प्रेरणादायी गीत इतनी शक्ति हमें देना दाता ने झाली. मुख्यमंत्री देवेंद्र फडणवीस यांनी आपल्या भाषणात सांगितले की, हा डायग्नोस्टिक सेंटर गोरगरीब व सर्वसामान्य नागरिकांसाठी समर्पित असून, नागरिकांना सवलतीच्या दरात उत्तम आरोग्य सेवा उपलब्ध होईल. त्यांनी फाऊंडेशनच्या या उपक्रमाचे अभिनंदन केले आणि समाजसेवेचा हा आदर्श उपक्रम असल्याचे प्रतिपादन केले.

केंद्रीय मंत्री नितिन गडकरी यांनी गंगाधरराव फडणवीस यांच्या व्यक्तिमत्त्वाचा गौरव करत सांगितले की, त्यांच्या नावाने उभारलेले हे सेंटर त्यांच्या सेवाभावाचे प्रतीक असून, आरोग्य सेवेला सर्वोच्च प्राधान्य देण्याची गरज अधोरेखित केली. त्यांनी नमूद केले की, कॅन्सरसारख्या गंभीर आजारांवरील उपचार अत्यंत महागडे आहेत, त्यामुळे अनेकांना उपचार घेता येत नाहीत. अशा परिस्थितीत, स्वस्त दरात डायग्नोस्टिक सेवा उपलब्ध होणे ही मोठी समाजसेवा आहे.

सरसंघचालक मोहनजी भागवत यांनी आपल्या मार्गदर्शनात गंगाधरराव फडणवीस यांच्या सार्वजनिक आणि राजकीय कार्याचे उदाहरण दिले. त्यांनी सांगितले की, सेवा, शिक्षण, आरोग्य आणि रोजगार या चार स्तंभांवर समाज उभा राहतो आणि सेवा ही उपकार नसून आत्मशुद्धीचा मार्ग आहे.

या सेंटरच्या माध्यमातून सर्वसामान्य आणि गोरगरीब नागरिकांना सवलतीच्या दरात विविध वैद्यकीय तपासण्या उपलब्ध होणार असून, नागपूर शहरात आरोग्य सेवेला एक नवीन बळ मिळणार आहे. कार्यक्रमाची सांगता राष्ट्रगीताने करण्यात आली.

हा उपक्रम समाजाच्या सर्व स्तरांपर्यंत, विशेषतः शेवटच्या घटकांपर्यंत आरोग्य सेवा पोहोचवण्याच्या दिशेने उचललेले एक महत्त्वपूर्ण पाऊल ठरत आहे.