महत्वाच्या बातम्या

विदर्भाला उन्हाच्या तडाख्यानंतर पावसाचा दिलासा : शुक्रवारी ढगाळ हवामानासह गारव्याची शक्यता

विदर्भ न्यूज एक्सप्रेस
प्रतिनिधी / नागपूर : नागपूरसह विदर्भातील अनेक जिल्ह्यांमध्ये गेल्या १० दिवसांपासून उष्ण लाटेची झळ लोकांना सहन करावी लागत आहे. हवामान विभागानुसार, गुरुवारपर्यंत उष्ण लाटेचा सामना करावा लागणार असून त्यानंतर शुक्रवारपासून वातावरणात बदल होण्याची शक्यता आहे.

उष्ण लाटेची झळ -
बुधवारी नागपूरमध्ये कमाल तापमान ३८.४ अंश सेल्सियस नोंदले गेले, जे सरासरीपेक्षा ३.२ अंश जास्त आहे. अमरावती ४०.४ अंश, अकोले ४१ अंश, चंद्रपूर ३८.२ अंश आणि ब्रम्हपुरी ४० अंश तापमानाच्या उच्चांकावर पोहोचले आहेत. वर्धा, वाशिम आणि बुलढाण्यातही तापमान सुमारे ३९ अंश सेल्सियस आहे. हवामान विभागानुसार, गुरुवारपर्यंत दिवसाचा ताप अधिक राहील आणि उष्ण लाटेचा सामना करावा लागेल.

हवामानात बदल आणि पावसाचा अंदाज -
हवामान विभागानुसार, १३ मार्चपासून वातावरणात बदल होईल. शुक्रवारपासून आकाशात ढग दाटण्याची शक्यता आहे, तसेच ३५–५० किमी प्रतितास वेगाने वादळी वारे वाहण्याची शक्यता आहे. हलका ते मध्यम स्वरूपाचा अवकाळी पाऊस होण्याचीही शक्यता आहे.

तापमानात घट -
पावसाळी वातावरणामुळे शनिवार १४ मार्चपासून कमाल तापमान ३–५ अंशाने घटण्याचा अंदाज आहे. यामुळे विदर्भातील नागरिकांना उष्ण लाटेपासून मोठा दिलासा मिळेल, असा हवामान विभागाचा अंदाज आहे.