Petrol Price
पानगावात घराशेजारी गांजाची लागवड : १७६ झाडे जप्त
- ५७.५८३ किलो गांजा हस्तगत; ११ लाख ५१ हजार ६६० रुपयांचा मुद्देमाल जप्त, ६३ वर्षीय व्यक्तीविरुद्ध गुन्हा दाखल
विदर्भ न्यूज एक्सप्रेस
प्रतिनिधी / गोंदिया : घरामागील मोकळ्या जागेत गांजाची लागवड केल्याचा प्रकार सालेकसा पोलिस ठाण्यांतर्गत येणाऱ्या पानगाव येथे उघडकीस आला आहे. गोपनीय माहितीच्या आधारे पोलिसांनी शुक्रवारी २३ ऑक्टोबर दुपारी कारवाई करून गांजाची १७६ हिरवी झाडे जप्त केली. या झाडांचे एकूण वजन ५७.५८३ किलो असून, त्यांची अंदाजित बाजारमूल्यानुसार किंमत ११ लाख ५१ हजार ६६० रुपये आहे. या प्रकरणी धरमदास दादुराम मनघटे ६३ वर्षे रा. पानगाव याच्याविरुद्ध गुंगीकारक औषधी द्रव्ये व मनोव्यापारावर परिणाम करणारे पदार्थ अधिनियमान्वये गुन्हा दाखल करण्यात आला आहे.
गोपनीय माहितीवरून पोलिसांची धडक कारवाई -
मिळालेल्या माहितीनुसार, सालेकसा पोलिस ठाण्यात कार्यरत सहाय्यक पोलिस निरीक्षक महेंद्र गवई यांना पानगाव येथील धरमदास मनघटे याने आपल्या घरामागील ताब्यातील मोकळ्या जागेत गांजाची लागवड केल्याची गोपनीय माहिती मिळाली होती. त्यांनी ही माहिती पोलिस निरीक्षक रवी नागोसे यांना दिली. या माहितीच्या आधारे शुक्रवारी दुपारी सुमारे ३ वाजता उपविभागीय पोलिस अधिकारी नंदिनी चानपुरकर आणि पोलिस निरीक्षक रवी नागोसे यांच्या उपस्थितीत पोलिस पथकाने संबंधित ठिकाणी धाड टाकली. पानगाव येथून सोनपुरीकडे जाणाऱ्या रस्त्यालगत असलेल्या विटा व सिमेंटच्या विनाप्लास्टरच्या घरासमोरील मोकळ्या जागेत गांजाची झाडे लावण्यात आल्याचे पोलिसांना आढळले.
अवघ्या १० बाय २० फुटांच्या जागेत १७६ झाडे -
पोलिसांनी संबंधित जागेची पाहणी केली असता सुमारे १० बाय २० फूट क्षेत्रफळात गांजाची लहान-मोठी हिरवी झाडे वाढविण्यात आल्याचे दिसून आले. झाडांच्या पानांचा वास आणि अन्य निरीक्षणांवरून ती गांजाची असल्याची खात्री करण्यात आली. त्यानंतर पंचांच्या उपस्थितीत पोलिसांनी सर्व झाडे मुळासकट उपटून जप्त केली. जप्त केलेल्या झाडांची मोजणी करून प्रमाणित इलेक्ट्रॉनिक वजनकाट्यावर वजन करण्यात आले. त्यामध्ये एकूण १७६ झाडांचे वजन ५७.५८३ किलो भरले. या गांजाची अंदाजित बाजारमूल्यानुसार किंमत ११ लाख ५१ हजार ६६० रुपये निश्चित करण्यात आली.
एनडीपीएस कायद्यान्वये गुन्हा दाखल -
या प्रकरणी सहाय्यक पोलिस निरीक्षक महेंद्र गवई यांच्या तक्रारीवरून धरमदास मनघटे याच्याविरुद्ध गुंगीकारक औषधी द्रव्ये व मनोव्यापारावर परिणाम करणारे पदार्थ अधिनियम (NDPS Act) कलम ८(ब), २०(अ) आणि २०(२)(क) अन्वये गुन्हा नोंदविण्यात आला आहे. घराशेजारील मोकळ्या जागेत गांजाची लागवड केल्याचा प्रकार उघडकीस आल्याने पानगाव परिसरात चर्चा सुरू झाली आहे. या कारवाईत जप्त करण्यात आलेल्या गांजासंदर्भात तसेच प्रकरणातील अन्य बाबींबाबत सालेकसा पोलिसांकडून पुढील तपास सुरू आहे.
